रोल्पा । रोल्पामा पहिरोले घर पुरिँदा दुई जनाको मृत्यु भएको छ भने दुई जना घाइते भएका छन्।
रोल्पाको थबाङ गाउँपालिका–५ बोटलबारामा बुधबार राति करिब ८ः४० बजे घरमाथिबाट पहिरो खसेर घर तथा गोठहरू पुरिएका हुन्। जिल्ला प्रहरी कार्यालय रोल्पाका अनुसार स्थानीय कमलबहादुर पुन मगरको घरसहित अन्य ६ वटा घर तथा गोठ पहिरोले पुरिएका छन्।
पहिरोमा परी थबाङ गाउँपालिका–५ का ६० वर्षीय कमलबहादुर पुन मगर र १८ वर्षीया शान्ती पुन मगरको मृत्यु भएको प्रहरीले जनाएको छ।
त्यस्तै, २२ वर्षीय हिमाल पुन मगर र २५ वर्षीय सञ्जय घर्तीमगर घाइते भएका छन्। प्रहरी र स्थानीयवासीको सहयोगमा उनीहरूको उद्धार गरी प्राथमिक उपचार भइरहेको छ। दुवै घाइतेको अवस्था गम्भीर रहेकाले थप उपचारका लागि जिल्ला बाहिर पठाउने तयारी भइरहेको प्रहरीले जनाएको छ।
पहिरोमा अन्य व्यक्तिसमेत पुरिएको हुन सक्ने आशंकामा प्रहरीले स्थानीयको सहयोगमा खोजी तथा उद्धार कार्य जारी राखेको छ।
प्रतिकृया दिनुहोस