१९ चैत, काठमाडौँ / प्रतिनिधिसभाका सभामुख देवराज घिमिरेले राष्ट्रिय स्वतन्त्र पार्टी (रास्वपा)का सभापति रवि लामिछानेको सांसद पद निलम्बन कानुन अनुसार भएको बताएका छन् ।
सभामुख भेट्न मंगलबार सिंहदरबारस्थित उनकै कार्यकक्षमा पुगेका रास्वपा सभापति लामिछानेलाई घिमिरेले भने, ‘कानुन भन्दा माथि कोही पनि छैन । मैले कानुन अनुसार नै गरेको छु जे गरेको छु ।’
भेटमा लामिछानेले आफूमाथि राजनीतिक प्रतिशोधका आधारमा सम्पत्ति शुद्धीकरणको मुद्दा लगाइएको बताए । सांसद पुर्पक्षका लागि थुनामा रहेको अवस्थामा मात्रै निलम्बन हुन सक्ने प्रावधान रहेको पनि लामिछानेले सभामुखलाई स्मरण गराए ।
जवाफमा सभामुख घिमिरेले आफूले कानुन अनुसार नै जिम्मेवारी निर्वाह गरेको बताएका हुन् । सम्पत्ति शुद्धीकरणको मुद्दा लगाउने र सांसद पद निलम्बन गर्ने प्रवृत्ति गलत रूपमा विकास हुन सक्नेतर्फ आफू समेत चिन्तित रहेको उनले बताए । तथापि, आफूले कानुन बाहिर गएर केही नगरेको पनि सभामुख घिमिरेले बताए ।
लामिछानेले सम्पत्ति शुद्धीकरणको मुद्दा लगाएर सांसद पद निलम्बन गरिदिने प्रवृत्ति जो सुकैका हकमा समेत लागू हुन सक्ने बताए । लामिछानेको यस्तो चिन्ताप्रति सभामुखले आफूलाई समेत त्यस्तो लागेको बताए । लामिछानेले यो विषयमा राजनीतिक दलहरूसँग संवाद गर्न सभामुख घिमिरेलाई सुझाए ।
सभामुखसँगको भेटपछि लामिछानेले पत्रकारहरुसँगको कुराकानीमा पनि यही विषय राखेका थिए । उनका अनुसार सम्पत्ति शुद्धीकरणको मुद्दा लगाइने र सांसद पदबाट निलम्बन गरिदिने प्रवृत्ति बढे सरकारको संख्या नै तलमाथि हुनसक्ने सम्भावना समेत रहन्छ । यो विषयमा सभामुखले आफू चिन्तित रहेको बताएका छन् ।
लामिछानेले आफूमाथि लगाएकोजस्तो मुद्दा सरकारले विपक्षी पार्टीका नेतालाई मात्रै नभएर पार्टीभित्रै पनि प्रतिस्पर्धीलाई लगाउन सक्ने बताए ।
यो विषयमा सदनमै छलफल चलाउन समेत लामिछानेको माग छ । लामिछानेले आफूले सांसद पद निलम्बनको अवस्थाबारे सदनमा छलफल गर्ने प्रस्ताव राखेको बताए ।
‘एक पटकमा कति जनासम्मलाई निलम्बन गर्न पाउने हो र किनभने मुद्दा टेकाइदिए त पुग्यो, मुद्दा किनारा लाग्न कति वर्षौं लाग्छ सबैलाई थाहा छ’ लामिछानेले पत्रकारहरूसँग भने, ‘यो सरकारले विपक्षी पार्टीको मात्रै होइन, आफ्नै पार्टीभित्र प्रतिस्पर्धी छ भने त्यसलाई पनि यो हतियार प्रयोग गर्नसक्ने भयो ।’ लामिछाने पुस ८ गतेदेखि सांसद पदबाट निलम्बित छन् ।
संघीय संसदको हिउँदे अधिवेशन सुरु हुने पहिलो दिन गत माघ १८ गते पनि सभामुख घिमिरेलाई भेटेर लामिछानेले सांसद पद निलम्बन फुकुवाको माग गरेका थिए । मंगलबार उनले पुनः भेटेर निलम्बन फुकुवाको आग्रह गरेका हुन् ।
प्रतिकृया दिनुहोस