को बन्ला दिल्लीको मुख्यमन्त्री ?

नयाँ मुख्यमन्त्रीबारे छलफल गर्न आज दिउँसो भाजपा संसदीय दलको बैठक बसेको थियो । सो बैठकले रविशंकर प्रसाद र पार्टीका राष्ट्रिय सचिवसमेत रहेका ओमप्रकाश धनखडलाई दिल्ली विधानसभामा भाजपा दलको नेता चुन्न पर्यवेक्षक तोकेको छ ।

 काठमाडौं / नयाँदिल्लीको सत्तामा २७ वर्षपछि पुनरागमन गरेको भारतीय जनता पार्टी (भाजपा)ले आज मुख्यमन्त्री चयन गर्दैछ । नवनियुक्त मुख्यमन्त्रीको शपथ ग्रहण समारोह विहीबार मध्याह्न रामलिला मैदानमा हुने छ ।

नयाँ मुख्यमन्त्रीबारे छलफल गर्न आज दिउँसो भाजपा संसदीय दलको बैठक बसेको थियो । सो बैठकले रविशंकर प्रसाद र पार्टीका राष्ट्रिय सचिवसमेत रहेका ओमप्रकाश धनखडलाई दिल्ली विधानसभामा भाजपा दलको नेता चुन्न पर्यवेक्षक तोकेको छ । उनीहरुसहित आज साँझ ७ बजे बस्ने भाजपाको दिल्ली विधानसभा संसदीय दलको बैठकले दलको नेता चुन्ने छ र सोही नेता मुख्यमन्त्री नियुक्त हुने छन् ।

भारतीय मिडियाहरुका अनुसार प्रवेश शर्मा, रेखा गुप्ता, शिखा राय, विजेन्द्र गुप्ता, आशिष सुद, सतिश उपाध्याय लगायत मुख्यमन्त्रीको आकांक्षी छन् । उनीहरुमध्ये को मुख्यमन्त्री बल्ला भन्ने चासो छ ।

केही मिडियाले भारत नयाँदिल्लीको मुख्यमन्त्रीमा भाजपाकी रेखा गुप्ता नियुक्त हुने सम्भावना रहेको उल्लेख गरेका छन् । दैनिक भाष्करले हिन्दु स्वयंसवेक संघ (आरएसएस)बाट ५० वर्षीया रेखा गुप्ताको नाम प्रस्तावित भएको र भाजपाका नेताहरु उनलाई मुख्यमन्त्री बनाउन सहमत पनि भएको उल्लेख गरेको छ ।

गुप्ता शालिमारबागबाट निर्वाचित भएकी थिइन् । उनी यसअघि दिल्ली नगर निगमको मेयर समेत भइसकेकी थिइन् । उनी भाजपा दिल्लीकी महासचिव र महिला मोर्चाको उपाध्यक्ष पनि हुन् ।

तर आजतकले भने प्रवेश बर्मा मुख्यमन्त्री बन्ने बढी सम्भावना रहेको जनाएको छ ।

उनी दिल्लीको पूर्वमुख्यमन्त्री साहिब सिंह बर्माका छोरा हुन् । उनले आम आदमी पार्टी (आप)का संस्थापक अरविन्द केजरीवाललाई चुनावमा हराएका थिए ।

यद्यपि केही मिडियाहरुले भने प्रवेश बर्मामाथि आपराधिक मामलाको एक मुद्दा रहेकाले उनी मुख्यमन्त्री बन्ने सम्भावना कम रहेको उल्लेख गरेका छन् ।

भारतको केन्द्रीय राजधानी पर्ने नयाँदिल्ली प्रदेशको सत्ता दुई कार्यकालसम्म आपको हातमा थियो । तर हालै सम्पन्न विधानसभा निर्वाचनमा आपलाई हराउँदै भारतीय जनता पार्टी (भाजपा)ले २७ वर्षपछि सत्तामा पुनरागमन गरेको थियो ।

प्रतिकृया दिनुहोस
प्राप्त प्रतिक्रिया
तपाईँको मत