काठमाडौं / प्रिमियर लिग २०२३-२४ को सिजन अब सकिन लागेको छ । लिगमा तीन चरणको खेल मात्र बाँकी रहँदा पनि कसले उपाधि जित्छ भन्ने कौतुहलता छ । तर उपाधि होडमा सबैभन्दा अघि छन् आर्सनल र म्यानचेष्टर सिटी ।
युरोपका पाँच ठूला लिगमध्ये स्पेन, इटली, जर्मनी र फ्रान्समा लिग विजेता टुंगो लागिसकेको छ भने इंग्ल्याण्डले लिग विजेता पाउन भने अझै केही खेलको नतिजा कुर्नुपर्नेछ ।
साविक विजेता म्यानचेस्टर सिटी लगातार चौथो पटक उपाधि जित्ने होडमा छ भने आर्सनल २० वर्षपछि पहिलो पटक उपाधि जित्ने लक्ष्यमा छ ।
लिगमा अब आर्सनलले २ र सिटीले ३ खेल खेल्न बाँकी रहँदा उपाधि होड रोमाञ्चक बन्दै गएको छ । एक खेल बढी खेलेको आर्सनलले सिटीले भन्दा एक अंक नै बढी जोडेको छ ।
सिटीका प्रशिक्षक पेप ग्वार्डिओलाले भनेका छन् कि उपाधिका लागि आफ्नो टिमले बाँकी तीनवटै खेल जित्नुपर्नेछ । ‘एक हप्तामा तीन खेल खेल्न बाँकी छ । त्यसमा ९ अंक लिन सके हामी च्याम्पियन हुनेछौं । नभए ७, ६ वा ३ अंकले आर्सनलले प्रिमियर लिग जित्नेछ’, उनले भने ।
यदि सिटीले बाँकी ३ खेल जित्यो भने लगातार चार प्रिमियर लिग उपाधि जित्ने पहिलो टोलीको रूपमा इतिहासमा नाम लेखाउनेछ ।
वल्भ्सविरुद्ध एर्लिङ हालान्डको चार गोलमा सिटीले आफ्नो पछिल्लो अवरोध सजिलैसँग पन्छाएको छ ।
वल्भ्सका मालिक ग्यारी ओ’निलका अनुसार सिटीसँग खेल्न अहिले सबैभन्दा कठिन छ । ‘म्यानचेस्टर सिटी जब लगातार चौथो प्रिमियर लिग उपाधि जित्न खोजिरहेको छ । उनीहरु अहिले उत्कृष्ट लयमा छन् र इतिहासले पनि तपाईंलाई बताउँछ कि यस समयमा उनीहरूलाई रोक्न गाह्रो छ’, उनले भने ।
अब सिटीले फुलहमसँग उसैको मैदान क्याराभान कटेजमा खेल्नेछ । फुलहम त्यस्तो टोली हो जसलाई सिटीले लगातार १५ पटक हराएको छ।
सिटीले अन्तिम खेल वेष्टहमसँग घरेलु मैदानमा खेल्नेछ । सन् २०१६ मा ग्वार्डिओलाको आगमनपछि सिटीले घरेलु मैदान इत्तेहाद स्टेडियममा वेष्टहमविरुद्धको खेलमा कुनै अंक गुमाएको छैन ।
त्यसपछि भने सिटीले टोटनहमको भ्रमण पनि गर्नेछ । सिटीले टोटनहमको नयाँ मैदानमा कुनै गोल पनि गर्न सकेको छैन र अंक पनि जोड्न सकेको छैन ।
आर्सनलले भने म्यानचेष्टर युनाइटेड र एभरटनसँग खेल्न बाँकी छ । ग्वार्डिओला म्यानचेस्टर युनाइटेडले आर्सनललाई हराउन सक्नेमा विश्वस्त छैनन् आर्सनलले १२ मे मा म्यानचेष्टर युनाइटेडको होम ग्राउण्ड ओल्ड ट्राफोर्ड भ्रमण गर्नेछ ।
सिटी सही समयमा लयमा
सिटीका लागि एक मात्र नकारात्मक पक्ष भनेको गोल अन्तर हो । सिटी भन्दा आर्सनल ६ गोलअन्तरले अगाडि छ । जसले गर्दा सिटीले लिग जित्न शीर्ष स्थानमै पुग्नुपर्छ । बराबरीले पर्याप्त हुँदैन ।
‘गोलअन्तर सम्भव छैन’, ग्वार्डिओलाले भने, ‘हामीले बराबरी खेल्नुहुँदैन । हामीले ९ अंक नै जोड्नुपर्छ ।’
बीबीसी म्याच अफ दी डे सँगको छुट्टै कुराकानीमा गार्डिओलाले वेष्टहमसँगको खेल जित्दै उपाधि जित्ने अवसर हुने बताएका थिए ।
आर्सनलले म्यानचेष्टर युनाइटेडलाई हराएमा र सिटीले फुलहम र टोटनहमसँगको खेल हारेमा वा बराबरी गरेमा सिटीको उपाधि होड अन्तिम खेलअघि नै सकिनेछ ।
तर सिटी गज्जबको लयमा छ । डिसेम्बर ६ मा एस्टन भिल्लामा पराजित भएपछि सिटीले १६ जित र चार बराबरीसँगै अचम्मको लय कायम राखेको छ ।
गत सिजन, सिटीले १६ खेलको अपराजित यात्रामा १४ खेल जित्दै उपाधि हात पारेको थियो भने अन्तिम दिन ब्रेन्टफोर्डमा हारेको थियो । त्यसको अघिल्लो वर्ष तिनीहरूले २८ खेलमा एक खेल मात्र हारे भने २३ खेल जितेका थिए ।
त्यसभन्दा अघिको सिजन, तिनीहरूले १९ खेलको अपराजित यात्रामा १७ खेल जितेका थियो ।
‘सिजनको अन्त्यमा तपाईं फरक ढंगले सोच्नुहुन्छ’, सिटीका पूर्वडिफेन्डर मीका रिचर्ड्सले स्काई स्पोर्ट्सलाई भनेका छन्, ‘यी खेलहरू सबैभन्दा महत्त्वपूर्ण छन् र त्यहाँ सिटीले लय समात्न सक्छ ।’
आर्सनल मद्दतको लागि प्रार्थना गर्दै
रिचर्ड्सका साथी फुटबल पण्डित जेमी रेडक्नापले भने आर्सनलको हकमा बाटो सिधा रहेको बताए ।
उनीहरूले ओल्ड ट्राफोर्डमा खेल जित्नैपर्छ र त्यसपछि अन्तिम दिन फेरि एभर्टनविरुद्ध पनि जित्नुपर्छ । अरू सबै कुरा तिनीहरूको हातबाट बाहिर छ ।
मिकेल अर्टेटाको आर्सनलले दुई सिजनमा जसरी खेलेको छ त्यसलाई हेरेर केहीले आर्सनलले २००४ पछि पहिलो लिग उपाधि जित्न सक्ने बताएका छन् ।
तर, योर्गेन क्लोप र लिभरपुलले पत्ता लगाएजस्तै सिटीसँग नजिक हुनु र उनीहरुलाई पछि पार्नु दुई फरक कुरा हुन् ।
आर्सनलका मिडफिल्डर डेक्लान राइसले पनि सिटी राम्रो टोली रहेको बताए । उनले भने, ‘उनीहरूले गरेको कामको लागि ठूलो सम्मान छ । तर हामीसँग दुई खेलहरू छन् र हामी हाम्रो लक्ष्यमा पुग्न प्रार्थना गरिरहेका छौं ।’
प्रतिकृया दिनुहोस